أنا شاعر بالمشاعر
لكن كلام ..
مافيش
بعدِّي في ألف خطوه
والخطوه متعدّيش
عايش دور البطوله
لكن من غير أفيش
لانا جندي في المعارك
ولا حتي سلاح في جيش
ولا عارف أبقي حاجه
من حاجه متساويش
************
وانا شاعر بالاهانه
والذل ازاي اعيش؟!
وازاي انطق كلامي
ولساني عليه شاويش؟
وارفض سكوتي وأقول
هكتب حروف بالريش
وابدأها (بسم الله )
الحِبر مايكفّيش
************
وارجع من يوم ولادتي
وادخل في المفرمه
واقلّب الأفكار
ألاقيها
مِكَمكِمه
أزرع فيها الأمل
- باليأس مغرمه
أرويها بنبضتين
- للموت مستسلمه
ف اسيبها تموت بسرعه .. واهرب م الجُمجُمه
**********
وارجع أفتح مسامي
وادخل في دمي حامي
ألاقي الدم جامد
وتموت حروف كلامي
**********
طب أروح لمين وليه ؟
وكلامي يسوي ايه ؟!
لو حد ما حسّ بيه
هعيش كما العدم
همسح كل الكلام
واكسَر سِن القلم
واقطّع الورق
د من جلد البجم
لا عِرف عالأرض يرسي
ولا حتي يكون عَلم
