النهاردة معاية ليكم نكتة طويلة شويه
بس أعتقد ما حدش كتير سمعها قبل كده لأنها من أيام جدى و جدك الكابتن هيثم
مع بعض التحوير فى الأحداث قليلاً من جانبى
يوم فى الهيلتون بـ 1000 جنيه
واحد بلدياتنا راح يبات هوا و المدام فى الهيلتون ليلة
تانى يوم الصبح بيطلب من موظف الاستقبال الحساب و دار بينهم هذا الحوار :
الرجل : الحساب كام من فضلك ؟
الموظف : 1000 جنيه بس يافندم
الرجل : ألف جنيه ليه يا أستاذ ... كتير قوى مبلغ ألف جنيه فى ليلة
دى كانت ليلة واحدة يا محترم
الموظف : أجرة المبيت فى الليلة بـ 400 جنيه
الرجل : طب و الـ 600 جنيه الباقيين ليه بقى إن شاء الله ؟؟
الموظف : عندك 100 جنيه أجرة الموظفين اللى بيشيلوا الشنط
سيادتك لما نزلت من التاكسى مش كان فيه شيالين بيشيلوا الشنظ منتظرينك ؟
الرجل : أما غريبة و الله ... بس أنا شيلت الشنطة بنفسى و ماحدش شالهالى
الموظف : ماهو كانوا موجودين قدام سعادتك .. ما ناديتش عليهم يشيلولك الشنطة ليه ؟؟
الرجل :
الموظف مستطرداً... هاكمل لحضرتك باقى المبلغ
عندك 50 جنيه إستعمال سجاجيد السجادة اللى من غرفة حضرتك للمطعم
الرجل : أنا ما مشيتش على سجاجيد أنا كنت بامشى على الحتة الفاضية اللى مش مغطياها السجادة
الموظف : ماهى السجادة كانت عند سعادتك .. ما مشيتش عليها ليه ؟؟
الرجل :
الموظف : و عندك 200 جنيه إستخدام حمام السباحة
الرجل : بس احنا ما نزلناش عومنا فى الحمام خالص .. هوا احنا وش عوم و مايوهات
الموظف : حضرتك حمام السباحة كان قدام سعادتك ما نزلتوش عومتوا ليه ؟؟
الرجل :
الموظف : و عندك 100 جنيه إستعمال التليفزيون و قنوات الدش و الريسيفر فى القوضة
الرجل : دش ايه اللى انت جاى تقول عليه !
احنا ما شغلناش امبارح غير القناة الأولى و التانية .. هوا كان فيه دش !!
الموظف : قنوات الدش كلها كانت عند سعادتك ما اتفرجتش عليها ليه ؟
الرجل :
الموظف : و عندك 150 جنيه إستعمال سخان الميه اللى بالكهربا فى القوضة
الرجل : الدنيا كانت حر أصلاًُ و ما أستعملناش السخان فى حاجة
الموظف : مالناش دعوة .. السخان كان عند سعادتك ما إستعملتوش ليه ؟؟
الرجل : أما شيىء سخيف قوى
انتظر الرجل لـ لحظات ثم أخرج له 400 جنيه فقط
الموظف : دول 400 جنيه بس
الرجل : الـ 600 جنيه الباقية حق ما بوست المدام بتاعتى
الموظف : ايه الكلام الفارغ ده ... حضرتك عاوز تجيبلى مصيبة
هوا أنا بوست المدام بتاعتك خالص و لا جيت جنبها !!
الرجل : ماكانت قدامك امبارح ما بوستهاش ليه ؟؟
نشوف بقى ردودكم إذا الموضوع عجبكم
